नेपालगञ्जको सद्भाव र शिक्षासेवी विकास बहादुर सिंहको योगदानको डा. अमरेश कुमार सिंहद्वारा प्रशंसा

२३, असोज २०८३ शुक्रबार 

बाँके, नेपालगन्ज – प्रतिनिधि सभा सदस्य डा. अमरेश कुमार सिंह र शिक्षा क्षेत्रमा ३५ वर्षदेखि समर्पित शिक्षासेवी विकास बहादुर सिंहबीच आज नेपालगन्जमा विशेष भेटघाट तथा संवाद भएको छ।

भेटघाटका क्रममा डा. सिंहले नेपालगन्जलाई हिन्दू–मुस्लिमबीचको भाइचारा, आपसी सद्भाव र सहिष्णुताको उत्कृष्ट उदाहरणका रूपमा व्याख्या गर्नुभयो। उहाँले नेपालगन्जको सामाजिक एकता र सद्भावलाई विश्वकै लागि प्रेरणादायी रहेको बताउनुभयो।

शिक्षा क्षेत्रमा विकास बहादुर सिंहले पुर्‍याउँदै आएको ३५ वर्ष लामो योगदानको चर्चा गर्दै डा. सिंहले उहाँको सक्रिय नेतृत्व, उत्कृष्ट कार्यसम्पादन, शालीन व्यवहार तथा सामाजिक सेवाको प्रशंसा गर्नुभयो।

त्यसैगरी, विकास बहादुर सिंहको मुख्य कार्यटोलीमा विभिन्न धर्म, जातजाति र संस्कृतिका व्यक्तिहरू एकताबद्ध भएर सामाजिक कार्यमा सक्रिय रहेको देख्दा आफूलाई खुसी लागेको डा. सिंहले बताउनुभयो। विविधताबीचको एकता, सहकार्य र मानव सेवाको भावना समाजका लागि अनुकरणीय रहेको उहाँको भनाइ थियो।

भेटघाटका क्रममा डा. सिंहले आगामी दिनमा विकास बहादुर सिंहले नेतृत्व गरिरहेको विद्यालयमा पुगेर विद्यार्थीहरूसँग प्रत्यक्ष भेटघाट तथा संवाद गर्ने प्रतिबद्धतासमेत व्यक्त गर्नुभयो।

शिक्षा, सामाजिक सेवा र धार्मिक–सामाजिक सद्भावलाई जोड दिने यस भेटघाटले नेपालगन्जको बहुसांस्कृतिक पहिचान, सहकार्य र मानवीय एकताको महत्त्वलाई थप उजागर गरेको छ।