०७, मङ्सिर २०८२ आइतबार
बाँके, कोहलपुर – परमेश्वरको मण्डली विश्व सुसमाचार समाजद्वारा कोहलपुरमा “निस्तार–चाडको प्रेम, जीवन बचाउने प्रेम” भन्ने मूलभावनासहित १७५२औँ रक्तदान कार्यक्रम भव्य रूपमा सम्पन्न भएको छ। कार्यक्रममा ४७ जनाले सफलतापूर्वक रक्तदान गर्दै कुल १६,४५० मिलिलिटर रगत नेपाल रेडक्रस सोसाइटीलाई हस्तान्तरण गरिएको छ।
छिमेकीका लागि प्रेम र त्यागको उदाहरण
मण्डलीका पदाधिकारीका अनुसार ख्रीष्टको बलिदान र प्रेमको अनुकरण गर्दै रगत अभावमा संकटमा परेका छिमेकीको जीवन बचाउन यो अभियान चलाइएको हो। “रगत कुनै पनि पदार्थले प्रतिस्थापन गर्न सकिँदैन, अर्को व्यक्तिको प्रेमपूर्ण योगदानले मात्र प्राप्त हुन्छ,” भन्दै कार्यक्रमको उद्देश्य स्पष्ट पारियो।
उपमेयर सुवेदी: “रक्तदान नै सर्वश्रेष्ठ मानवीय सेवा”
मुख्य अतिथि कोहलपुर नगरपालिकाकी उपमेयर सङ्गिता सुवेदीले रक्तदानलाई सबैभन्दा पवित्र र सर्वोत्तम मानवीय कार्य भन्दै सहभागीहरूलाई धन्यवाद व्यक्त गरिन्।
“जसरी आमाबुबा किनेर पाइँदैन, रगत पनि किनेर पाइँदैन। यसलाई मानवले नै मानवलाई दिनुपर्छ,” उहाँले भनिन्।
१०० भन्दा बढी सहभागी, १४१ जनाको जीवन बचाउने सम्भावना
स्वास्थ्य परीक्षणदेखि सम्पूर्ण प्रक्रिया रेडक्रसको प्राविधिक सहयोगमा व्यवस्थित रूपमा सञ्चालन भयो। ४७ जनाद्वारा गरिएको रक्तदानले करीब १४१ जनाको जीवन बचाउन सकिने बताइँदै कार्यक्रमलाई सफल मानिएको छ।
Advertisement
विश्वभर सक्रिय मण्डली, लाखौँको जीवनमा सकारात्मक प्रभाव
परमेश्वरको मण्डलीले केवल नेपालमै होइन, अमेरिका, जर्मनी, भारत, फिलिपिन्सलगायत ६४ देशमा १,६७७ पटक रक्तदान कार्यक्रम आयोजना गरिसकेको छ।
सेप्टेम्बरसम्म ३,०९,०६९ जना सहभागी र १,३२,९२३ जना रक्तदाता बनेका छन्, जसको प्रभावले ३.६ लाखभन्दा बढी जीवन बचिएको अनुमान छ।
Advertisement
समाजसेवामा निरन्तर योगदान
रक्तदान मात्र होइन, काठमाडौं, ललितपुर, भरतपुर, नेपालगञ्जलगायत क्षेत्रका खोला–नदी, वन तथा सार्वजनिक स्थलमा सरसफाइ अभियान, ‘आशाको वन’मार्फत १,१५० भन्दा बढी वृक्षारोपण, साथै विभिन्न प्रकोप राहत र शैक्षिक सहायता कार्यक्रममार्फत मण्डलीले उल्लेखनीय योगदान दिंदै आएको छ।
यिनै कार्यका आधारमा मण्डलीले अमेरिकी राष्ट्रपति स्वयंसेवा अवार्ड, दक्षिण कोरियाली राष्ट्रपति पुरस्कार, बेलायती महारानी स्वयंसेवा अवार्डसहित ५,४०० भन्दा बढी राष्ट्रिय तथा अन्तर्राष्ट्रिय सम्मान प्राप्त गरिसकेको छ।
निस्तार–चाडको प्रेमबाट प्रेरित मानवीय समर्पण
कार्यक्रमले निस्तार–चाड (Passover) को ‘विपत्ति पार हुन्छ’ भन्ने गहिरो अर्थलाई समाजसेवामार्फत जीवन्त बनाउँदै छिमेकीप्रति प्रेम, त्याग र सहानुभूतिको सन्देश फैलाएको छ।
यसरी, परमेश्वरको मण्डलीको निरन्तर समाजोपयोगी योगदानले स्थानीय समुदायदेखि विश्वभरका नागरिकसम्म सकारात्मक प्रभाव छोडिरहेको स्पष्ट देखिन्छ।