भारतका मोदी, नेपालका ओली: शैलीको समानता कि संयोग?

१९, जेष्ठ २०८२ सोमबार 

काठमाडौं, 

प्रधानमन्त्री एवं नेकपा एमाले अध्यक्ष केपी शर्मा ओलीले आफूलाई ‘झोले’ भनेर अभिव्यक्त गरेसँगै एमालेले सामाजिक सञ्जालमा ‘म झोले हो’ अभियान सुरु गरेको छ। यो अभियान भारतीय प्रधानमन्त्री नरेन्द्र मोदीको सन् २०१९ को ‘मै भि चौकीदार’ अभियानसँग मिल्दोजुल्दो देखिन्छ।

भारतीय कांग्रेसले मोदीलाई ‘चौकीदार चोर हे’ भन्दै हमला गर्दा भाजपा नेताहरूले त्यसको जवाफमा ‘मै भि चौकीदार’ भन्दै सामाजिक सञ्जालमा तस्बिरहरू पोस्ट गरेका थिए। त्यसकै शैलीमा अहिले नेपालमा एमालेले ‘झोले’ शब्दलाई सकारात्मक रूपमा प्रस्तुत गर्दै सशक्त सन्देश प्रवाह गर्ने प्रयास गरेको छ।

अभियान अन्तर्गत प्रधानमन्त्री ओलीले फेसबुकमा आफ्नै तस्बिर राख्दै लेखेका छन्, ‘म झोले हो’। तस्बिरमा थप लेखिएको छ, ‘एउटा सामन्ती परिवारको दास बन्नुभन्दा देशमा परिवर्तन र विकासको झोला बोकेर हिँड्न कयौं गुणा उत्तम चरित्र हो।’

प्रधानमन्त्री ओलीले शनिबार नेकपा एमाले निकट बुद्धिजीवी परिषद्को महाधिवेशनमा सम्बोधन गर्दै जनताको हितका मुद्दा बोकेर हिँड्ने ‘झोले’ हुनुमा आफू गर्वित भएको बताएका थिए। उनले भनेका थिए,

‘इतिहासलाई जस्ताको त्यस्तै राख्ने, सही बाटोमा अघि बढाउने म एमालेको झोले हुँ। देशका जनताको झोले हुँ। अब भयो चित्त बुझ्यो प्रतिक्रियावादीहरूलाई।’

ओलीले थपे,

‘झोला बोक्नकै लागि बनेका हुन्। राम्रा कुरा बोकेर हिँड्न त्यसमा के आपत्ति? झोले हुनुमा गर्व छ, तर राम्रा कुरा बोकेर हिँड्नुमा गर्व छ।’

प्रधानमन्त्री ओलीको यो अभिव्यक्तिपछि एमाले नेताहरूले एकै प्रकारको शैलीमा ‘म झोले हो’ भन्दै सामाजिक सञ्जालमा पोस्टहरू राख्न थालेका छन्। अर्थमन्त्री विष्णु पौडेल, महासचिव शंकर पोखरेल, प्रधानमन्त्रीका प्रमुख सल्लाहकार विष्णु रिमाल र युवा संघ अध्यक्ष क्षितिज थेवेले पनि फेसबुकमा ‘झोले’ क्याप्शनसहित तस्बिरहरू पोस्ट गरेका छन्।

पछिल्लो समय ‘झोले’ शब्द दलका कार्यकर्ताहरूलाई व्यंग्य गर्न प्रयोग गरिँदै आएको छ। त्यही आलोचनालाई आत्मसात् गर्दै एमालेले यसलाई सकारात्मक सन्देश दिने अवसरका रूपमा प्रयोग गरेको देखिन्छ। यो अभियान एमालेको सन्देश रणनीति तथा जनसम्पर्कमा नयाँ शैलीको प्रयोगका रूपमा हेरिएको छ।

निष्कर्षतः, आलोचना र व्यंग्यलाई आत्मसात् गर्दै त्यसलाई सशक्त सन्देशमा रूपान्तरण गर्ने एमालेको ‘झोले अभियान’ नेपाली राजनीतिक संचार शैलीमा फरक मोड हुन सक्छ। अब हेर्न बाँकी छ—जनताले यसलाई कसरी लिन्छन्।