नवराज विक लगायत ६ जनाको सम्झनामा दीप प्रज्वलन कार्यक्रम, जातीय विभेदविरुद्ध सशक्त आवाज

१०, जेष्ठ २०८२ शनिबार 

इरफान अलि 

बाँके, नेपालगन्ज
२०७७ सालको यही दिन, रुकुम पश्चिमको चौरजहारी नगरपालिका–८, सोतीमा अन्तरजातीय प्रेम सम्बन्धकै कारण जाजरकोटबाट आएका नवराज विक सहित ६ जना युवाहरूमाथि भएको विभत्स जातीय नरसंहारको सम्झनामा आज नेपालगन्जमा दीप प्रज्वलन कार्यक्रम सम्पन्न भएको छ।

विपी चोकमा साँझ ६ बजे सुरु भएको कार्यक्रममा, सहभागिहरूले दीप प्रज्वलन गर्दै विभेद र हिंसाको विरोधमा मौन श्रद्धाञ्जली अर्पण गरे। कार्यक्रममा समाजका विभिन्न क्षेत्रका अगुवा, नागरिक समाज, अधिकारकर्मी र पत्रकारहरूको उल्लेखनीय सहभागिता रहेको थियो।

राष्ट्रिय दलित पत्रकार संघ, बाँके शाखाद्वारा आयोजित कार्यक्रमले जातीय विभेदविरुद्धको सशक्त सन्देश सम्प्रेषण गरेको छ। वक्ताहरूले न्याय नपाएका पीडित परिवारको पीडा, कमजोर अनुसन्धान र राज्यको उदासीनता प्रति गम्भीर चिन्ता व्यक्त गरे।

“नवराज विकको बलिदान नेपाली समाजमा समावेशीता र समानताको आन्दोलनको प्रतीक बनेको छ,” कार्यक्रममा बोल्दै एक अधिकारकर्मीले भने।

कार्यक्रमले जातीय विभेद र छुवाछुतविरुद्धको अभियान अझ तीव्र पार्नुपर्ने आवश्यकता औंल्याएको छ।